तिहारको मुख्य दिन कार्तिक २७ गते शुक्रबार मध्याह्न ११ बजेर ५५ मिनेटमा भाइटीका लगाउने शुभसाइत रहेको समितिले जनाएको छ ।
‘यसअघि कालबेला पर्ने भएकाले यस वर्ष मध्याह्न ११ः५५ मा शुभबेलाको साइत उत्तम हुन्छ, त्यसपछि दिनभर भाइटीका लगाउनसकिन्छ’–समितिका अध्यक्ष प्रा.डा. रामचन्द्र गौतमले भने ।
उज्यालो, पशुपंक्षी पूजा, भ्रातृभगिनी प्रेम, मिठाइ र सेलरोटी सेवन, फूल तथा मुलुकको मौलिक नेपाल संवत्को प्रारम्भ, महाकवि जयन्ती जस्ता विशेषता बोकेको यमपञ्चक कार्तिक २३ गते सोमबारदेखि सुरु हुनेछ ।
कार्तिक २३ गते काग तिहार र धन्वन्तरि जयन्ती तथा कार्तिक २४ गते मंगलबार नरक चतुर्दशी र कुकुर तिहार पर्ने समितिले जनाएको छ ।
काग तिहारका दिन यमदूत काग र कुकुर तिहारका दिन यमदूत कुकुरलाई मीठा खानेकुरा खान दिइने शास्त्रीय परम्परा छ ।
नरक चतुर्दशीका दिन बिहानै उठेर तिलको तेल लगाई नरके स्नान गरेमा वैज्ञानिक रुपमा शरीरभित्र पानी पस्दैन भन्ने छ । धार्मिक रुपमा नरक जानु नपर्ने र सुख शान्ति मिल्ने विश्वास रहेको प्रा.डा. गौतमले जानकारी दिए ।
कार्तिक २५ गते लक्ष्मीपूजा, दीपमालिका र सुखरात्रिका लागि कुनै साइतको आवश्यकता नपर्ने पनि उनले जानकारी दिए । त्यसैदिन भलो होस् भनी भैलो खेल्ने परम्परा रहेको छ ।
कार्तिक २६ गते गाईपूजा, गोबद्र्धन पूजा, गोरु र नेवारी समुदायको म्ह(आत्म)पूजा गरिन्छ । यसैदिन कात्तिक शुक्ल प्रतिप्रदादेखि नेपाल संवत् पनि सुरु हुन्छ । यसदिन साँझदेखि देउसी खेल्ने गरिन्छ ।
कार्तिक २७ गते भाइटीका लगाएपछि नेपालीको दोस्रो ठूलो पर्व तिहार सकिन्छ । रासस
from SHYANE http://ift.tt/1Hyoq7a
via समाचार
0 Reviews:
Post Your Review